هذي سالفة يرويها الشاعر سويلم العلي السهلي رحمه الله يقول حنا سنة من السنين وافق عندنا ربيع ونازلين في
هكالجو يحدنا من شرق ضلع مطاول من الجنوب للشمال نازلين بمحل ربيع أرضه طيبة بالحيل , يقول جينا
ونزلنا في طرفها من الجنوب ومعنا غنم وحلال ويوم قعدنا لنا مدة وينزل عنا شمال ناس وعنا غرب ناس ومن
كل عرب نازلين حولنا لكن حنا اللي أطرفهم من جنوب يقول العرب هذولا أكثرهم عندهم حلال ورعيان
ويرحون منا يمين ويسار وإذا جا الليل بعض المرات يسير بعضهم على بعض هالعرب يعزمون بعض والى فيه
ناس توهم نازلين ومن شمال ويوم جا مرة من المرات توافق عزيمة عند القريبين ويعزمونا ونروح لهم أنا وأبوي
وقعدنا عندهم وراعي البيت يرحب وإلى عنده حريم وله عيال ما شاء الله واجد وقاعدين يصبون القهوة في بيت
الشعر ومستانسين ويسولفون وسالفة تدور وقهوة تجي وقهوة تروح الحاصل إن المعازيم راحوا وتفرقوا وطلعت
أنا وأبوي وبطلعتنا والى تمر ذيك البنت بنت لراعي البيت عليها جلال وتسوق الغنم بنت متعافية وجميلة جدا
يقول وأنا اللي أنصاب من هالبنت من أول نظرة يوم شفتها بس معي أبوي ولا اقدر أقول شي ( ايه تعرفون
تبلعون العافية إذا جا معكم احد ) ومرت الأيام ونتوافق على ماردا وعلى السيل والى البنت فعلا غاية في الأدب
والجمال حتى هو كلامة دمث وأخلاقه طيبه هذا كان عفه العرب وسلومهم حتى لو لقى بنت وما عندها أحد
يكلمها كلام عادي ويمزح مزح شريف وعفيف وتلقاه يسولف مع البنت وهي بعيدة عنه , وتمضي الأيام وتخافت
البنت دمه وشافته حليل وصار دايم يفكر فيها ويشوفها وإلى جا الليل صار يهوجس فيها وليت من يزورهم وليت
من يروح بس ما يقدر يروح لكنهم يشوفون بعض دايم ومضت مدة وبدا هالربيع الي هم فيه يضعف شوي ودايم
العرب يتابعون حلالهم ويرحون يمين ويسار وإلى الجبل اللي يحدهم فيه طيور وفيه ملازم ماء فوق وهو ضابط
مكانهم ,
ويوم جا يوم من الأيام عقب مدة بعد ما توافقوا كم مرة ودائما البنت الذكية إلى وافقت مثل هذا حتى لو مهوب
من عربهم ما تبين أنها ما تبيه تمنيه وتعلقه وتخليه معلق بخيط أرهف من الشعرة وتقوله أنت حبيب وطيب وأنا
ما شفت أحسن منك ولا أحسن من أخلاقك ويتعلق هو ويحسب هالحكي أنه صدق وهي تسنع خبزتها ما دام أنها
هنا علشان لا سمح الله ما يصير عليها اعتداء يصير المسأله حب شريف وهي على اللي هي عليه هي تلقاها في
فكرها أما موبدة لها ولد عم وإلا واحد قريب مهوب معقول تبي تعشق واحد من بعيد وتأخذه ولا هوب العلم
عندها العلم عن أهلها .
الحاصل يقول يوم جا يوم من الأيام وأعدي على هكالضلع جبل رفيع وأمشي وأطالع وأشوف يقول ماقدرت
أشوفهم ولا أستكشف المنطقة هذي إلا اذا عديت هالضلع ويوم رقيته وإلاني أشوف الناس يشدون اللي يروح
شمال واللي يروح غرب شادين كلهم وأقرب عن مكان الطيور ويوم طالعت وبرقت زين وإلى والله هذولاهم
يشدون يطون كل شي بيروحون وإلى كل هذيك الأيام يفكر ومعجب فيها من لباقتها وعلومها وأنها ما تسمع كلام
أحد ورايها براسها وياصفها وياصف جمالها يمكن أنه لا محها وشايفها ( المحه ذبحه ) عن قريب أو من ورى
البرقع طيره الهوى المهم انه شايف شي ( ما تخلون المناظر ) ويقول عاد قلت الأبيات هذي
يوم عديت في راس الطويل العسير = دوني الطير خفاق الجناحين حام
بادي فيه اطالع وين قاد النشير = احد قاد قبـــلة واحد قاد شـــــام
آه وا قد قلبي يوم قض الحجير = كن قلبي يقد بحد باري العظـــام
كن قلبي يقد بحد موس شطير = اثر راع المودة لاشكى ما يــــلام
المصيبة إلى جا الليل عقب الأخير = كل ناظر ينام وناظري ما ينام
كيف ابنسى وليف ما استمع للمشير = ما يطيع الخوال ولا يطيع العمام
مع لباقته علومه فيه زين غزير = قرن ضافي ووسط خافق ياسلام
المطوع إلى منه نظرها يحير = تفتح ابصار عقله ما يــرد الكـــلام
خده اشقح عفر وصفه تقل به ذرير = نور خده يقادي نور بدر الظلام
والشفايا حمر تشدى سلوك الحرير = والثنايا تلالا بيض حدر اللثام
اشغل القلب ياالاسلام طير يطير = باللحن يالله انك لا تعيد الحمام
doPoem(0)
ويقصد في ( اشتغل القلب ياالاسلام طير يطير ) يا العالم يا المسلمين يا ناس , راحوا وشدوا وابعدوا وصار ينشد
عنهم وإلى ما عندك أحد ومدري من جاب له العلم قال هي ما سألت عني قال ياحليلك الحين تصدق هذاك أول
يوم أنك قريب عندها لكن إذا بعدت وغابت العين عن العين ما عاد يمدي يرحون الناس ويلهون في أشغالهم , قال
بس أنا متعلق فيها وفي حبها وأثرهم راحوا ونسوني وهو يقصد ذيك القصيدة بعد مدة ويقول فيها :
يامل قلب كل ما ناموا الناس = من الليل ياخذ ربع ساعة وياعي
فإلى وعا جته الهواجيس من راس = وقام يتقلب في فراشه وياعي
ولولا ضلوعي للمعاليق حباس = لافوع فوعة واحد من قطاعي
قطيع غرب وغطلس الشوف الادماس = بارض خمال وخارشتها السباعي
ودلى يلوج وكل اشافيه يباس = وتاه الطريق وراح فكره ضياعي
وجنه سباع مع سنا الليل غلاس = مستفرسات وممسيات جياعي
صكن عليه ومزعن عنه الألباس = يشل دمه مع طمان ورفاعي
لين اودعن ثربه برجليه ينحاس = عند الضواري راح ماله شفاعي
يا أهل النضا ياللي على كوار جلاس = بتر الفخــوذ مذلقات السماعي
شعل مواشعهن مثل شاهي الكاس = مدربات بالسهل والجراعـــي
اليا سربن مع صحصح تقل قرطاس = مع عرضة الزيزي يجيه الجلاعي
ريضوا لعله ما يريضكم الباس = عوجوا لي ارقاب النضا بالوقاعــي
وشيلوا وصاتي للغضي عذب الاجناس = اللي مع المرسال وصله جزاعي
لا جيتوا المجمول مدقوق الالعاس = مدملج العضديــــن زين الذراعي
قولو تراها قطعت عنها الارماس = يطوي العزا وأنا كلاي دواعــــي
من باعني بعته وأنا قاسي الباسي = حتى واصد بناظري لا يراعي
لو أن كبدي كنها فوق محمــاس = عزمي قوي مانا خطات الزعاعي
ياعين هاتي واطوي الصبر والياس = معطيك مهلة دامنا بالوساعي
اطوي عزاك وترسي كل هوجاس = ما ظنتي عقب الفراق اجتماعي
الجمعة فبراير 01, 2008 12:44 pm
